嗱嗱嗱，話口未完又嚟嘞。深水埗鴨寮街尋日又冧石屎，一幢舊樓外牆有塊長約十米、高一米半嘅巨型招牌，其中兩條入牆鋼索突然鬆脫，大量外牆石屎被扯甩飛墮行人路，好彩冇擊中途人。警方接報後通知屋宇署人員到場，招牌證實有危險，其後被拆除，如果跌埋落嚟，後果不堪設想。

叮！十幾日前沙田圓洲角發生冧樹殺人慘劇，幾日前中環政府合署西座對開一棵榕樹倒冧，傷咗兩人，砸毀的士。冧完大樹又差啲冧招牌，一鑊未完又一鑊，你話香港係咪邪開有條路呀？

淨係講鴨寮街吖，今年三月曾經有人將一樽腐蝕性液體由高處掟落街，一名男途人被飛濺嘅液體灼傷。嗰次已經係深水埗區鏹彈狂徒第三次行兇，但警方至今破唔到案。兩個幾月前，距離鏹彈案現場約五十公尺，有人光天化日之下將菜刀飛掟落街，直頭想收買人命。短短一條鴨寮街已經爆咁多劑，香港簡直變成危城一座。

呢次差啲冧招牌同上次掟菜刀都慶幸冇傷到人，但唔係次次都咁好彩，亦唔係人人都咁好運。嗱，前年灣仔就發生過餐廳巨型招牌突然墮下，壓死一名女途人嘅慘劇。危險招牌如同都市炸彈，一日唔拆除，分分鐘會攞人命。

港府統計顯示，全港有招牌二十二萬個，其中十分之一已經被棄置，呢啲招牌絕大多數年久失修，嚴重銹蝕。即係話香港有二萬幾個「懸臂式計時炸彈」吊喺街上，隨時令市民頭殼頂開花。

弊在港府清理危險招牌得個噏字。呢，金融海嘯爆發後，當局使一千八百萬公帑做咗場「拆招牌保就業」騷，但拆咗五千個危險招牌之後就鳴金收兵，由得剩低嗰一萬五千幾個繼續條條Fing。如果唔係當局做嘢半途而廢，尋日鴨寮街又點會天降石屎，差啲搞出人命吖。

有立法會議員話，深水埗舊樓多，舊招牌更多，打風落雨特別危險。佢話曾經建議屋宇署替招牌負責人登記，將「無主招牌」拆除。不過，當局似乎又係左耳入右耳出。

颱風季節就快殺到，冧樹壓死人，兩千棵高危病樹位置喺邊依家都未公布；通街危險招牌又冇人理，試問仲要死傷幾多人，當局至肯做嘢？難為曾蔭權仲好意思扮風雅，噏乜鬼「一簑煙雨任平生」，計太一叮話齋，市民家陣係「一頂鋼盔求平安」就真。叮！