原來高錕夫婦喺上禮拜已收到政府嘅電郵通知，高太黃美芸話兩夫婦都感到好高興同榮幸，希望可以藉此啟發港人為香港貢獻所長。咁呢次政府頒發大紫荊勳章畀高錕，對佢嚟講又有冇特別意義呢？高太諗一諗之後話：「光纖技術已在四十多年前發明，近二十年才被廣泛應用。」咁講係咪太遲？高太又話：「他已經年老了！」再追問係唔係應該早幾年頒呀？高太只係重複：「他已經年老！」

其實高太喺丈夫拎諾貝爾獎嘅時候都講過覺得太遲，高錕喺香港工作咁多年，高太呢次咁講，係咪暗寸政府唔識寶，大紫荊勳章頒得太遲，令高錕等到老？

高太又提到由於屋企冇請工人，日常生活已經好繁忙，所以應該唔會有特別慶祝活動，而兩夫婦會喺九月返港，應該會出席埋授勳典禮。高錕係名副其實嘅「香港之光」，市民當然好希望見到佢親身出席，將嗰個沽名釣譽嘅鬍鬚曾比下去。