據悉，中央早喺五月二十八號接觸金勞詹，指明唔接受白鴿黨區會方案，但要建制派三十六票歸隊為政改方案投支持票，以示團結。金勞詹當場拒絕，仲反過嚟幫白鴿黨講好話，游說中央接受方案，從此扮演起「中間人」角色。

話說六月三號中午，金勞詹向全國人大常委范徐麗泰推介區會方案，夜晚上禮賓府同煲呔曾食飯，佢教煲呔曾上書中央爭到底。六月十六號，中央再派人問佢意見，當時佢力主採納方案，陳明利害，指若方案再難產，激進民主派會對特區管治造成「文革式」破壞，亦會為建制派喺出年區議會同後年立法會選舉會帶嚟反效果等。翌日，基本法委員會副主任梁愛詩改口風，指方案可以考慮，成為事件轉折嘅風向標，到底係咪巧合？

後來到咗十九號，中聯辦副主任李剛約金勞詹食飯，李剛叫佢代為向白鴿黨探問，若中央接納方案，白鴿黨係咪一定撐政改，張文光回覆金勞詹：「OK！」翌日李剛見白鴿黨，正式澄清中央認為方案冇違反《基本法》，為方案開咗綠燈。

問過有份喺二十號見李剛嘅張文，證實前一晚金勞詹的確搵過佢，建仔劉江華亦話金勞詹曾成功游說佢接受區會方案，睇嚟金勞詹的確出行力谷政改起錨。