點解咁惹火？除咗政治立場備受質疑外，膠樽義嘅治校方針同手法亦引起唔少學生不滿，其中引起最大回響嘅除咗卸任前拒絕民主女神像進駐中大之外，頒發榮譽博士學位畀董建華同樣惹起極大爭議。校政方面，佢將中大教學語言硬性改為英文呢一項政策，就搞到學生要透過司法覆核抗議。另外，中大各書院院長一聲令下變咗做委任制等，全部都令到學生好唔滿意。

曾被教職員轟不務正業

至於佢份新工，原來喺舊年已經向行政會議申報做咗呢間公司嘅董事，為轉職鋪路根本有迹可尋，只係勢估唔到呢頭唔做校長，嗰頭就咁心急下海從商搵真銀啫。

其實都唔奇怪吖，因為好多人都知佢個心早就飛咗出去㗎喇！就喺幾個月前，因為佢身兼十幾項受薪董事同公職，估計呢啲校外職務收入佔佢年薪兩成，畀一群關注校務嘅教授同教職員炮轟不務正業，只顧外務忽略校政。

有人就諗到，自從回歸之後，行政會議裏面梗會有啲具中資機構背景嘅人坐鎮，但自從范鴻齡辭咗中信泰富董事總經理同行會職務後，呢個具中資背景嘅「席位」就一直懸空，依家膠樽義做咗副董事長之後，行政會議呢個中資背景位終於有人頂，確係啱啱好。

呢邊廂膠樽義走去私人公司搵銀，嗰邊廂新任中大校長沈祖堯就懷住戰戰兢兢嘅心情上任，處理上手留低嘅爛攤子。佢上任首日就發表網誌，引用二次大戰時英國首相邱吉爾嘅名句：「我沒有別的可奉獻，除了獻出我的辛勤、血汗和淚水」，嚟表明心迹，承諾會奉獻一切畀中大。