係嘅，前日天文台的而且確發出黃色暴雨警告。學政務司司長唐英年話齋「打風落雨，係會冧樹」，天要下雨，娘要嫁人，樹木辦以及一眾相關官僚聽天由命。

不過，環保團體長春社負責人蘇國賢去現場視察，發現完全唔係嗰回事。棵榕樹嘅根部已經發霉，表面亦有腐爛迹象，估計棵樹係因為根部冇足夠空間生長，加上泥土透氣度低，至會壞死。

照咁講，康文署至少有三宗罪。第一宗罪，怨天尤人，死不認錯。嗱，棵樹根部七成腐爛，已經冇晒支撐力，遲早都會冧，康文署唔檢討自己嘅責任，賴晒天雨，卸膊神功實在一流。

第二宗罪，草率養育，害樹害人。喂，呢棵樹十幾米高，一米幾闊，幾個人都攬唔埋，但種喺豆腐膶咁大嘅花圃裏面，等同叫大人瞓BB床，梗係冇足夠空間生長啦，樹根唔腐爛至奇。

第三宗罪，馬虎巡樹，敷衍塞責。樹根爛成咁，梗唔係一日兩日嘅事啦，但係康文署三月底檢查完仲話「冇異樣」，唔通係發雞盲？連咁明顯嘅問題都查唔出。

講起康文署查樹，真係笑甩人哋棚牙。政府下令各部門對全港樹木做風險評估，康文署負責評估四十萬棵，任務雖然幾重，但好快就完成，原來全靠走捷徑。按規定，本來要寫清楚棵樹嘅健康結構、樹齡、茁壯程度、樹葉顏色、有冇傾斜等資料，但係康文署就只要求前線員工填「簡化版表格」，只填寫樹木位置、種類、編號及數量，以及係「正常」定係「需特別注意」。睇完份表，都唔知棵樹有冇事，更得人驚嘅係，填表人連名都唔使簽。咁樣檢查，點會唔睇漏眼？

有人話，喺香港生活千祈唔可以病，因為醫療事故多籮籮，去醫院求診，隨時冇命番出嚟。依家睇嚟，冇病都唔一定安全，因為行街都分分鐘會冧樹砸死。呢，沙田冧樹事故過咗唔夠一個月，依家又出事嘞，連政府總部都中埋招，簡直防不勝防。

一句講晒，政府總部冧樹唔係天災，而係人禍，嗰場黃色暴雨只係導火線咋。話時話，曾蔭權都應該多謝老天爺，如果冇呢場雨，棵樹捱到七一先至冧，一定傷亡慘重。到其時，煲呔曾真係水洗都唔清嘞。叮佢個鎯鎯！