身兼行政會議成員嘅教育學院校長張炳良，尋日返教院出席政改研討會，已經冇再戴住「起錨」襟章，點解？佢話方案都通過咯，唔使戴喇。雖然出席嘅人寥寥可數，但席間有教師質問張炳作為一個學者，佢同另一名行會成員梁智鴻幫政府拍宣傳片，究竟同學者身份會唔會有矛盾呢？呢位教師仲講明，張炳嘅答案將會成為佢嘅教學內容。

只係呼籲尋求突破

張炳即時笑笑口解釋，佢唔認為學者唔可以表態，加上宣傳片中即使有「起錨」標誌，但佢冇呼籲市民支持政府政改方案，只係呼籲啲人要尋求突破，仲話條片嘅內容由佢寫，所以佢記得十分清楚喎。

竟然話冇叫人撐政改方案。老實講，佢身為煲呔曾嘅內閣成員，若果唔撐政府嘅話，又點會答應拍宣傳短片，唔通睇住其他同袍大嗌起錨，自己就唔使上身？依家連票都投埋，佢梗係講得輕鬆喇；若然立法會仲未表決政改嘅話，睇佢又會唔會咁答呢？