尋日任總出席一個慈善機構嘅周年大會，聽見有記者咁質疑佢，佢即時烏低身同記者講：「你掹下、你掹下！」佢仲「一臉誠懇」咁話，依家都開始有甩幾條頭髮添。但轉頭又話唔知點解依家開始出番啲黑頭髮，搞到個頭黑咗好多。究竟佢係想話自己美髮得宜吖，抑或係喺度晒命，話退休後冇嘢煩，所以生番啲黑頭髮出嚟呀？

家下美容補身呢啲嘢唔再係女士專利，任總怕唔係打羊胎素呀嘛？任總笑一笑，跟住爽朗話自己冇乜點保養。

早幾日建行董事長郭樹清踢爆任總依家喺建行做非執董，冇得支薪，最多只係拎袍金，得十零萬「有限錢」。嘩！咁點夠任總之前去日本北海道燒鮑魚呀？任總笑笑口話喺函館燒隻鮑魚，一千日元就有交易，抵玩夾抵食。佢仲好認真咁話今次做非執董唔係為錢，而係想為國家服務。咁又係，任總唔願又有邊個請得起佢？