基本法委員會副主任梁愛詩近排人氣好高，事關佢居中斡旋促成中央接受白鴿黨區議會方案，令政改方案可以過關，但詩姐唔邀功，態度謙虛。尋日佢現身樂施會名牌義賣周活動，又再謙稱自己冇乜名牌可以捐贈，就算有都畀佢用到殘晒嘞！
詩姐話晒係樂施會董事局成員，既然做唔成捐贈者，咁又會唔會買番兩件支持吓呢？但佢以會場內人多，所以唔會買住，費事畀大家見到晒！蝦！佢低調到連做善事都唔想畀人知。
樂施會舉行名牌義賣活動已十幾年。據中環樂施商店負責人Ann話，好多城中名人都好支持佢哋，經常匿名捐贈名牌衫、袋同埋鞋，甚至日用品都有。
負責人話佢哋會按捐贈者買入時嘅原價，打個五折作為售價，所以有心人士可以落店舖試吓手氣，話唔定執到平、靚、正嘅八成新名牌貨㗎！