據了解，煲呔曾已正式邀請建仔喺七月十一日去粉嶺別墅食飯，但我哋向其他建制派政黨打探，工聯會KK黃國健、專業會議梁美芬、「五散人」陳茂波同葉劉淑儀都話，未收過煲呔曾嘅邀請。唔通喺煲呔曾眼中，只有建仔同白鴿黨嘅票先至值錢？就算唔係親疏有別而係前後有別，都已經夠乞人憎啦。

有人收到邀請都唔去

KK講笑自嘲，話唔知係咪立法會辯論方案時工聯會批評得太勁，所以慶功宴冇份呢？如果真嘅，煲呔曾就唔止大細超，仲係衰小器添！難怪唔少建制派中人都為此頂住條氣。

有建制派人士透露，煲呔曾早前出席建制派飯局，承諾方案通過就請食飯，直到上星期五嘅建制派飯局，席間有人提議係時候提醒佢兌現承諾，好多人即時大叫唔好，話要睇吓佢會唔會過咗海就係神仙，有人更表明就算收到邀請都唔會去，建制派對佢嘅不滿有幾深，可想而知。

仲有，五散人應邀喺方案表決前嘅星期日到禮賓府會面，有一散人遲到，煲呔曾遲遲唔肯現身迎客，到現身時一坐低就話入正題，口脗好似老闆見下屬一樣，當遲到嘅散人嚟到之後，佢更加黑面，求人都求得冇誠意，更何況請食飯！