木腐後樹毀，香港近年塌樹意外頻生，唔使講，政府樹木政策一定有問題。不過，今次連政府總部都塌樹，就相當弔詭，唔知有乜凶兆。專家話大樹倒塌係因為樹根發霉，表面有腐爛迹象，對照番現時煲呔曾政府嘅管治，真係相映成趣。

細葉榕塌樹，令政府總部中間嘅紫檀樹健康問題，再受關注。紫檀老樹儼如政府總部嘅守護神，○三年七一遊行之後，政府總部成為示威聖地，老紫檀更見證香港政壇巨變，對香港人尤其公務員嚟講，簡直係集體回憶，可惜喺政府樹木政策嘅陰霾下，紫檀老樹同其他古樹一樣，健康一直麻麻哋，令人擔心。

「派比安」襲港毀樹幹

○六年，政府決定將政府總部搬去添馬艦，政府公開承諾，全力保護紫檀樹，時任房屋及規劃地政局局長孫明揚喺當年七月立法會「保護政府山」議員議案中發言再次保證，但言猶在耳，八月份「派比安」襲港，紫檀老樹部分樹幹慘遭「骨折」，蒙受「切割手術」之苦。

事隔四年，塌樹問題未見改善，煲呔曾政府管治則每況愈下，細葉榕一倒，煲呔曾呢兩日肯定坐立不安，事關紫檀樹同細葉榕同喺政府總部範圍內，所謂一不離二，如果連紫檀老樹都倒塌埋，對風雨飄搖嘅煲呔曾政府就真係雪上加霜，正所謂樹倒猢猻散，快將倒台之說更加甚囂塵上。

康文署強調「目測法」可檢視樹木有冇倒塌危機，煲呔曾同三司十二局高官呢段日子唔該金睛火眼實棵樹，如果紫檀樹有乜三長兩短為你哋事問。咁梗係保唔到棵老樹，即係自保唔到喇！