不過，呢位仙女如果依家想喺度扮靚，就要自己帶鏡嘞。事關有發展商喺新娘潭附近大興土木，砍咗好多樹，仲開咗挖泥車入嚟，搞到瀑布上游嘅河水變咗黃泥湯，如果工程唔停止，唔使幾耐就會蔓延到瀑布，到其時，新娘潭就會變成亞洲首個黃泥瀑布。

新娘潭自然教育徑係屬於政府管轄嘅郊野公園。法例明文規定，未經政府准許，嚴禁喺郊野公園挖泥及污染河流。家陣有人公然破壞環境，當局點解唔理呀？

嗱嗱，政府部門又喺度表演卸膊神功嘞。環保署本來負責監察河流污染，但係居然對新娘潭被污染一問三不知，話會派人去了解吓喎。漁護署就話，一早就發現有人砍咗郊野公園嘅樹，仲將工程車違法開入公園，已經成功檢控，罰咗三千五百蚊。

罰錢唔係萬能嘅，對方交罰款後照樣開工，搏命挖泥，吹咩！當局明明睇見河水繼續被污染，點解唔下令停工呀？漁護署就話，被破壞嘅土地雖然喺郊野公園範圍，但地盤係屬於私人土地，當局阻止有困難。擺到明係想卸膊啫。叮！

難怪有環保團體狂批當局容許咁明目張膽嘅犯法，要求政府盡快修例加重刑罰。現行法例規定未經政府准許喺郊野公園內挖土及污染河流，最高罰款二千元，監禁三個月，的而且確係太輕，政府確實應該修例。不過，依家最大問題係政府有法不依，對污染郊野公園嘅行為隻眼開隻眼閉。

其實，類似嘅事多到數唔清，好多郊野公園早就變咗城市垃圾、建築廢料堆放區。當局唔單止唔制止，仲自己做埋一份。呢，環保署先排就唔理居民反對，侵佔清水灣郊野公園五公頃土地擴展將軍澳垃圾堆填區。清水灣郊野公園景色怡人，無端端割一忽做垃圾堆填區，大殺風景不特止，仲令居民生活大受影響。唔怪之得居民狂批當局大石砸死蟹，仲話要提出司法覆核。

唉，當年港英政府制訂「郊野公園條例」，將全港四成地方劃做郊野公園，唔單止保護咗大自然，仲令市民有休憩、遊樂嘅地方。勢估唔到，現時港人治港，反而搞到郊野公園亂晒大龍。睇吓呢班敗家仔點向子孫後代交代，叮你個鎯鎯！