暑假未到，本港失業率已經掉頭回升，多個工種都有失業人數上升嘅現象，顯示打工仔就業市場情況轉壞。不過，勞工及福利局局長張建宗尋日出席勞工處轄下嘅零售業招聘中心開幕典禮時，就好似先知咁，話零售業失業人數增加主要係僱員自動離職所致，並非裁員或者被解僱。唔通高官真係唔知離職都有被動離職嘅咩？
按照張建宗嘅講法，僱員係自動離職，咁失業率攀升嘅責任就唔在政府。佢呢番美化失業現象嘅說詞聽落好似幾正常，但工會人士就解釋，依家臨近暑假，已經有唔少畢業生湧出社會，而每年呢個時候，都有唔少中小企業以廉價請新人，低技術工種最容易被人取替，何況有啲企業會暗示、明示叫舊人離職，所以唔少舊人不堪現狀而離職，原因都係僧多粥少。
人力市場上正經歷一場殘酷嘅新陳代謝，絕唔係僱員自動離職咁簡單，張建宗作為主管勞工嘅政府高官，真係唔可以自我蒙蔽、放軟手腳！