Florence着咗件香檳金色、有暗花嘅旗袍出席，仲襯咗件閃令令嘅珠片短裝薄外套，戴埋對珍珠耳環，好似返到去六十年代。Florence屋企有幾件旗袍，每件都係搵上海裁縫做嘅，貪佢哋手工好。

開辦儀態訓練學校、堪稱美容儀態專家嘅華慧娜尋日都有出席，因為佢借出咗八件旗袍作展覽。佢話老公係英國人，最鍾意睇佢着旗袍，而且旗袍無論出席咩場合都咁得體，又唔使驚撞衫，真係好方便。不過，佢就提醒大家着旗袍時一定要着襪褲，唔係露出襪頭，就會好鬼肉酸。