婚姻監禮每次收四千幾

前晚白鴿黨開特別黨大會前，鄭家富事先張揚話自己一係就跟隨黨決定支持通過政改，一係就退黨反對，結果黨員大比數支持，佢就連會後記者會都唔蒲頭，但話或會退黨，佢到底係要做民主激進派吖，定係另有目的呢？據悉，白鴿黨內報名參加明年區議會選舉嘅程序早已完結，多年嚟都係雙料議員嘅鄭家富竟然冇報名。何況，依家白鴿黨喺新界東立法會選舉上已經另有兩條隊伍，連同改革派嘅范國威，鄭家富如果下屆再參選，真係三面受敵，所以早喺兩個月前已有傳聞話佢下屆會退選。

舊年高鐵撥款一役，已經有黨友戲言鄭家富焗留喺立法會應該損失唔少，當時講嘅就係佢嘅業務會受影響。所以綜合各種原因，鄭家富今次退黨風波，有黨友質疑可能真係另有內情。根據一則網上廣告顯示，鄭家富主持一次婚姻監禮收費四千幾蚊，咁好搵，做議員點比呀？