華懋集團執行董事兼管治委員會主席龔仁心近期動作多多，不但親自去拍賣會投地，早前又聯同兩個妹妹龔中心同龔因心出席公開場合，尋日三兄妹又一齊現身。華懋旗下荃灣如心廣場尋日獲頒發「最佳發展商—綜合建築項目」獎項，三兄妹齊齊到場，龔仁心上台領獎時，引述家姐龔如心遺訓，話只要華懋上下團結一致，就算爛地都能夠起到一幢好靚嘅大廈。
龔仁心賣花讚花香，話如心廣場已成為荃灣區嘅地標，如心海景酒店更成為香港最大嘅五星級酒店，表現得雄心壯志，難怪有傳聞話華懋計劃上市，但佢澄清話暫時冇上市計劃，不過將來嘅嘢好難講。龔仁心有興趣搞地產就係真嘅，佢有意競投山頂聶歌信山道地皮，仲話唔排除組財團投地，因為睇好樓市。梗係啦，華懋旗下淺水灣服務式住宅「The Lily」反應咁好，仲唔乘勝追擊咩！