仲享用緊十姑娘嘅房車

不過，鐵頭仁雖然一邊廂畀人鬧爆，一邊亦有網民明撐佢，話佢領導白鴿黨作出理性嘅選擇，解決咗本港政改嘅僵局，仲話佢係超人。亦有網民對一再踩場狙擊白鴿黨嘅社民連好不滿，甚至質疑鍾意跪拜、反政府嘅「80後」唔好下下都抬「80後」呢個名出嚟，好似代表晒呢個年齡層嘅青年咁樣，仲批評佢哋隨街寫字、畫污糟條街，累清潔工人更辛苦。

鐵頭仁同華叔雖然做咗今次政改風波嘅風眼人物，但畀人聲言要包圍佢嘅鐵頭仁坦言唔擔心，只係希望啲示威者唔好使用語言暴力。至於畀人話應獲頒大紫荊勳章嘅華叔，更加冷眼面對呢啲批評，咁啱尋日就有華叔嘅支持者用真金白銀刊登廣告以示支持，個廣告話華叔一世人一言一行都係行爭取民主嘅路，反而指摘挑戰佢嗰啲係民主投機分子。

另外，前晚白鴿黨漏夜通過支持區議會方案，社民連踩場令到鐵頭仁同幾名黨高層要由警方護送離開，當晚佢哋坐嘅房車雖然睇嚟殘舊，但登記車主原來係一間公司，而公司嘅股東正係「十姑娘」何婉琪嘅愛兒何東舜銘同陳復生。白鴿黨中人透露，當年鐵頭仁被人襲擊後，聘用佢做代表律師嘅十姑娘提供一輛房車連司機同保鏢畀鐵頭仁，原來佢一直享用至今，前晚呢架車再次出動，仲益埋黨友，接載埋劉慧卿、李永達同張文光離開添。