嗱嗱嗱！話口未完差啲嚟多劑。旅遊熱點鹿頸路南涌一棵三十米高大樹尋日有枯枝折斷，壓毀一架七人車，好彩事發嗰陣車上冇人。

聽落腳仔都軟埋。接連發生冧樹事件，證明當局驗樹漏洞多多。唉，如果政府真係信得過，真係有心做嘢，前年赤柱大街同上個禮拜沙田圓洲角公園嘅慘劇就唔會發生啦。

呢，兩單個案有好多共同點，除咗真菌侵蝕呢個「元兇」外，仲有檢查敷衍了事呢個「幫兇」，同樣係當局啱啱「目視」完就出事。赤柱冧完沙田冧，就算政務司司長唐英年出頭率領跨部門專責小組，仲煞有介事成立咗樹木管理辦事處（樹木辦）同綠化及園境辦事處（綠化辦），慘劇照樣發生。證明當局懶理前車之鑑，管理不善導致危機四伏，各部門權責不清嘅問題根本冇改善。

「東方報業民意調查」結果顯示，冧樹事件一再發生，呢次又有人畀病樹壓死，有三成四受訪者批評政府冇吸取教訓；兩成六直斥當局樹木管理得個講字，毫無改善；另有兩成六不滿有關部門管理疏忽，漠視人命。

講開又講，康文署現時嘅「目視檢測」認真信唔過。有專家踢爆，樹木受真菌感染到腐爛倒冧，最少要一、兩年，甚至長達十年；被評為「健康良好」嘅樹一個月後就冧，實屬罕有。專家仲列出當局管理樹木同護樹不力，危害樹木健康嘅「八宗罪」。檢測手法落後，檢測過程求其是但，唔怪得樹木冧完一棵又一棵，慘劇出完一單又一單啦。

調查又顯示，四成四受訪者認為，康文署冇發現肇事大樹已被真菌侵蝕，係檢查太馬虎；兩成七質疑當局為求交數敷衍市民；兩成三認為，問題樹走漏眼，已經變成都市炸彈。

講到呢度，太一叮真係把幾火。樹木辦同綠化辦早排話，位於人流、車流較多區域嘅風險評估已接近完成，亦檢查咗全港兩千棵危樹並作出補救，不過就拒絕透露危樹嘅位置，直到沙田發生冧樹事件，至話「考慮」公布。四成一受訪者批評當局封鎖訊息令透明度低；三成四指摘當局做事後知後覺。

調查仲發現，大部分受訪者對當局管理樹木嘅表現十分不滿。危樹事故頻生，搞到人心惶惶，近四成受訪者認為康文署、發展局以及轄下樹木辦同綠化辦都要負責，更有兩成五認為唐唐要負最大責任。

計太一叮話齋，樹木辦、綠化辦加埋唐唐，兩條廢柴一碌朽木，自己都隨時冧得，又點救病樹吖？ 叮！