教姪女着鮮色衫見工

頭箍小姐早幾日喺中環食晏時就着咗件淺黃色背心連身裙，以佢嘅風格，當然要襯埋黃色系嘅手袋、圍巾、高踭鞋同埋佢最愛嘅頭箍啦，出嚟嘅效果不知幾搶眼，都好切合夏天氣氛。

作為中環人，黑白灰可以話係OL返工主色，但頭箍小姐就唔係咁話。佢話事關唔計OT，每日最少要坐定定喺辦公室八、九個鐘，都唔好話唔悶，所以佢鍾意着鮮色衫返工，等辦公室多啲生氣，返工都返得開心啲。

佢仲教屋企啱啱讀完書嘅姪女們去見工嘅時候，雖然要着得正規啲，但不妨喺沉色suit入面加番件鮮色襯衣，等老闆對你更有印象，增加見得成工嘅機會率。