阿John陳祖澤即將卸任馬會主席，尋日喺快活谷嘅主席廂房，見到牆上掛住幾幅有佢Q版嘜頭嘅漫畫。其中有一幅細數佢嘅人生閱歷，由母校華仁書院嘅校徽，到九巴都一一入畫，筆觸清新有趣，難怪阿John咁鍾意。
佢話幅畫係個畫家朋友送嘅，賀佢○六年出任馬會主席。呢位朋友實係阿John嘅知己啦，事關畫作上盡顯同阿John有關嘅嘢，包括北京奧運標誌，因為佢有份喺香港傳遞火炬；又有佢揸咪唱大戲，連佢愛駒之一「勤有功」都寫咗喺左上角。最顯眼嘅要數阿John踩喺腳下嘅雙層巴士。佢離開政府後第一份工就係九巴董事長，所以喺另一幅同馬會幾位前董事一齊嘅漫畫中，巴士始終跟住佢齊齊入畫，睇嚟九巴已經成為咗佢人生中好重要嘅標誌嘞！
不過，點解畫中唔見政府呢？始終佢做咗二十七年公務員，喺香港回歸前做過唔少敏感而重要嘅工作喎。阿John笑而不答，老婆幫老公擋駕，話政府都離開咗好耐啦！