特區政府班高官硬銷政改方案已經到咗令人摸不着頭腦嘅地步。發展局局長林鄭月娥尋日喺福州出席「二○一○年內地與香港建築業論壇」，對住台下一眾建築界嘅京官、地方官同埋嚟自兩岸同香港嘅業界人士，竟然爆肚叫人撐政改。就算政改方案內容面臨修改照樣叫人支持，都唔知要支持邊個版本嘅方案！
政府新聞處尋日下晝發咗兩篇林鄭喺會上發言嘅新聞稿，第一篇係開幕禮致辭全文，睇勻全篇稿都冇「政改」兩個字，只係講吓啲客套說話，感謝吓合辦機構國家住房和城鄉建設部，讚美吓東道主福州，跟住介紹香港推動綠色建築嘅措施，順便交代香港援建四川嘅重建進度咁。
但二十分鐘後，新聞處又發咗第二篇新聞稿，話林鄭喺致辭時呼籲參與論壇嘅二百八十名香港建築界專業人士支持政改方案，話呢套方案係香港民主發展嘅重要步伐，唔可以再原地踏步。唔知係咪高官日日叫起錨口號，搞到個個好似鸚鵡學舌咁，唔理係乜嘢場合，去邊度都好，都係要講嗰兩句，算係交差呢？