有「李漢奸」稱號嘅白鴿黨創黨主席李柱銘又公然賣黨！白鴿黨千辛萬苦終於求得區議會方案被中央接納，但係「李漢奸」唔畀白鴿黨過安樂日子，尋日表明準備喺今晚嘅白鴿黨黨員大會提出，押後議決白鴿黨對政改方案嘅投票取向，一句講晒，即係又對白鴿黨搞破壞。
李柱銘畀人叫「李漢奸」，皆因佢成日手指拗出唔拗入，之前就唱衰香港，依家又經常拖白鴿黨後腿。最新鮮熱辣嘅一次，係佢公然講如果佢係煲呔曾，都會揀余若薇單挑辯論而唔揀白鴿黨主席何俊仁。
今次政改大戰，佢早前已發行摩打狙擊白鴿黨區會方案，據聞，黨內高層怕咗佢，曾私下游說佢，但「李漢奸」變本加厲，尋日揚言準備提出押後黨內議決白鴿黨九名立法會議員嘅投票取向，話黨員冇足夠時間考慮喎，唔通真係唔玩死白鴿黨唔安樂？政治係妥協嘅藝術，白鴿黨元老司徒華腰骨夠晒硬，佢都話要先接納方案再爭取普選。華叔話李漢奸唔識政治，又一明確例證。