中央對白鴿黨區會方案作出讓步，如無意外，政改方案將獲通過。有份參與談判嘅白鴿黨張文光尋日證實，區會方案一度畀中央否決，因得到唔少親中人士盡最後努力「營救」，先可重見天日，佢仲點名提到基本法委員會副主任梁愛詩同全國人大常委范徐麗泰，指佢哋為促成其事，奔走京港兩地。
但建制派有唔少人都有怨言。中央接納白鴿黨，首當其衝就係建仔，因為立法會區議會功能組別五個議席一人一票選出，隨時影響建仔喺下年區議會選舉同後年立法會選舉嘅勝算。
除建仔外，仲有啲建制派重量級人物心中有火，事關中央否定區會方案時，佢哋幫手出力狠批方案點樣違反《基本法》立法原意同全國人大常委會嘅○七《決定》，但依家等如畀人摑咗一巴，只係礙於大局，冇公開發火。
政改形勢突轉，煲呔曾過去兩日約晤立法會議員就區會方案向各黨摸底，竟顧此失彼，約漏一向對佢口下不留情嘅「詹Sir二人組」，「金勞詹」詹培忠話唔介意，會對政改方案貢獻自己一票，但「徒弟」謝偉俊就畀番面色煲呔曾睇，自嘲係二奶仔，連政府見議員自己都冇份，對區會方案都係要分析吓先，然後至決定投票取向，擺明心中有火。睇嚟，政改表決結束後，中央同特區政府都會忙於喺建制派內撲「火」囉。