煲呔曾搞「起錨騷」變倒米騷，就連上周四煲呔曾單挑公文袋黨魁余若薇嘅電視辯論，事前早就畀建制派睇死佢唔掂，抬高余若薇，仲畀公文袋嘅袋巾傑譏為拍「小電影」，事後亦證實果然被批中。

搞成咁係煲呔曾咎由自取兼自取其辱。據聞，佢發咗信邀余若薇拍呢套「小電影」之後，先喺早禱會話畀班司局長聽，仲話稍後會通知中央。佢自把自為，竟然沙膽到繞過中央，但到頭嚟喺電視辯論後發現返魂乏術，衰到貼地，又要中央打救，根本就係做衰份工。睇怕若果中央真係接納咗白鴿黨嘅方案，以佢咁厚面皮嘅性格，肯定會走出嚟邀功，話係經自己努力游說中央先搞掂咋！

鬍鬚曾賴死 推遲G20行程

煲呔曾係咁，佢嘅「真兄弟」、財爺鬍鬚曾好似倒模咁，「孖曾」衰埋一堆。喺起錨騷當中，鬍鬚曾都係倒米一族，最初落區企喺「大佬」後面，但冇跟住嗌口號，跟住仲畀街坊兜口兜面寸，跟住去中學硬銷政改，連基本資料都噏錯，去到邊度推銷都遇到示威者，搞到得個亂字。

但鬍鬚曾尋日喺個人網誌透露原本計劃喺後日起程去加拿大出席G20高峰會，話會順道去紐約市，同啲金融、銀行界嘅朋友見面，聽吓關於對現時經濟情況嘅睇法，但因為後日就係決定政改方案重要時刻，所以佢會留低以示支持，於是就推遲兩日先出發喎！

之前都冇聽佢幾時起程參加G20，依家政改方案可能有轉機獲通過，佢就話要留低喎，況且依家係中央幫手箍票，煲呔曾都沾唔到邊，鬍鬚曾又有乜能力去箍票，佢留喺香港毫無作用，要留低嘅唯一理由，可能又係賴死唔走等出嚟邀功，想幫自己貼金啫！