小白觀點：扮哈利仔狂隊奶油啤酒

哈利波特魔法世界主題公園開幕，本報贏晒所有華文報紙率先報道，《太陽報》讀者真係有福，小白老弟睇到都心思思，當然，由於我睇晒羅林咁多本書，假假哋算係半個哈利迷，好想親身投入呢個現實嘅魔法園，入去哈利仔最鍾意蒲嗰間三根掃帚酒吧，嗌一set奶油啤酒狂隊，但另外一個原因，就係呢個魔法園遠離中國國土，唔使玩都玩到成肚氣。

從新聞圖片，人哋魔法園開幕場面一樣勁墟冚，數以萬計哈利狂迷逼爆，個個笑到見牙唔見眼，唔會好似走難咁嗌到拆天，最令中國人感到奇怪嘅係，你唔會見有人喺入口指住實Q係咁鬧；又唔見好大十幾歲嘅美國巨B坐住嬰兒車入場；更加唔見有個金髮女郎着住高踭鞋坐輪椅博晒大懵啦，咁文明嘅主題公園，中國人再進化幾億年都做唔到出嚟，名副其實嘅魔法世界，唔去就笨。

Email：sunsiupak@gmail.com

Blog：http://sunsiupak.blogspot.com

阿豪觀點：捧《太陽報》先睹為快

美國佛羅里達州奧蘭多環球影城嘅哈利波特魔法世界主題公園，喺當地時間周五（即係本港時間星期六凌晨）正式開幕。一如既往，各位捧開《太陽報》場嘅讀者，又係全香港最先知先覺嘅人，事關我哋再次跑贏全港報章，率先同大家報道呢個消息！

雖然豪伯唔係忠實嘅哈利波特迷，但係睇完篇報道講到咁吸引，真係雖不能至，心嚮往之。但係遠在美國，好難話去就去，惟有睇住本報頂吓癮先。

唉，與其羨慕人哋外國，點解我哋唔可以自己搞個類似嘅主題公園呢？要知道，香港都有好多武俠小說名家，整個武林多姿多采，絕對唔比羅林嘅魔法世界遜色。唔好話咩吖，整番個「韋爵爺樂園」就夠過癮啦！不過諗諗吓都係算罷啦，一陣內地又有十幾個地方爭住做岳不群故鄉，到時盞有排煩！

Email：lukchiho75@hotmail.com

Blog：http://lukchiho.blogspot.com

網友觀點……

阿MUI：其他國家嘅主題公園陸續開幕，香港競爭力真係愈來愈低喇。

哈利迷：其他報章真係唔見有報道喎，若果能多啲圖片仲更加好。

小賓： 《太陽報》提到嘅破禁之旅最想玩，唔知幾時香港有得玩呢？

鄭大米：飲住哈利仔嘅至愛奶油啤酒嚟睇世盃，感覺一定好正！