【本報訊】黎新祥離世，對其徒弟打擊甚大，其友人和徒弟紛紛對恩師辭世表示傷感。剛接手香港足球代表隊的新任教練曾偉忠表示失落：「人生好脆弱，我同黎Sir好多年朋友，有唔少難忘片段，有次同佢去卡塔爾作賽，向來係『鐵人』嘅佢竟然冷傷風，我哋好驚訝！」
他稱願意接手執教港隊也是受黎Sir啟發：「我唔想出嚟教波，但見黎Sir患病，想教都教唔到，就諗通咗人應把握有能力時就去做，佢對香港足球好有堅持，好值得大家學習！」
至於現役港隊球員盧均宜，昨日憶起啟蒙恩師，不禁流下男兒淚：「我一出道就跟黎Sir，最難忘有次出戰全運會，球隊本來和波就出線，但因為我嘅失誤，結果輸波，我難過到喊，黎Sir卻同我講『傻仔，喊咩呀？你仲有咁多場波，一定要踢！』」
昨日於澳門運動場舉行的第六十六屆港澳足球埠際賽，賽前亦進行了一分鐘默哀儀式，最終港隊以五比一擊敗澳門。