不過市民驚係市民嘅事，官府就一直闊佬懶理。每當市民投訴僭建物，屋宇署一係話「無即時危險」，一係話「人手不足」，拖得就拖。本報記者最近發現，原來唔少政府建築物裏面都有僭建物添！

呢，旺角警署裏面嘅西九龍衝鋒隊總部，就加建咗多間鐵皮屋。深水埗警署仲誇張，佢哋用鐵板喺露天停車場築起圍牆，裏面擺滿鐵馬、垃圾桶等物件，喺貼有「危險品」告示牌嘅小屋附近，亦搭建咗一間佔地七十五平方米嘅鐵皮屋。據講，呢啲鐵皮屋多數用嚟放置裝備，萬一發生火警事故，後果不堪設想。

咦，警署之內公然僭建，莫非執法人員知法犯法？原來，法例仲有一項荒謬安排，規定所有政府建築物都唔受《建築物條例》規管，大小衙門只要獲得建築署批准，就可以繞過法例大興土木。建築署仲理直氣壯咁講，深水埗警署嘅加建部分係由佢哋安排興建嘅，至於旺角警署嘅鐵皮屋，由於年代久遠，暫時無從稽考。

叮！封建時代都話「天子犯法與庶民同罪」啦，香港作為一個現代都市，竟然仲有呢種官民雙重標準嘅法例，不但匪夷所思，更加令人擔心呢啲加建物嘅安全。正如有業主團體質疑，大家都見到旺角警署啲鐵皮屋好殘舊，但建築署就認為合乎標準，好明顯係官官相護。有立法會議員透露，過往曾經就警署同市建局大廈嘅僭建問題向政府查詢，正正係因為法例豁免，查詢冇咗回音，市民始終唔知相關建築物安唔安全。

議員及團體嘅批評，並非無的放矢，事實證明，政府建築物問題多多，絕對唔似大家想像咁安全。呢，旺角警署頂層外牆日前啱啱發生石屎剝落事故，一塊一呎乘兩呎，幾磅重嘅石屎從天而降，擊中西貢區議員方國珊嘅座駕，好彩冇人受傷，方議員批評：「政府連自己嘅物業都保養唔好，點叫人去保養物業呀？」

正所謂，其身不正，雖令不從，太一叮仲要補充一句，如果連政府都唔守法，點叫人去守法呢？當前要務，一就係速速修改《建築物條例》，對官民建築一視同仁；二就係由政府帶頭做起，加快清拆僭建物，畢竟樓宇安全關乎人命，大家都唔想見到慘劇重演㗎，叮！