小白觀點:消委會玩嘢兼掃興

睇世界盃，梗係要有幾罐啤酒跟埋一大堆薯片蝦條送啦，嘿，點知消費者委員會失驚無神公布話九成脆片零食都含高脂肪，喂，薯片會食肥人同阿媽係女人一樣，有邊個唔知吖，消委會擺明係掃興兼玩嘢啦。

小白老弟向來最怕呢啲咁嘅調查，反式脂肪未必食死人，睇得多呢啲反智調查，輕則智力變低，重則當堂激死。不過好彩我有套好完善嘅過濾系統，凡係報道食乜會心臟病，飲乜會生癌嘅消息，一律都唔睇。反而好似話飲紅酒可以抗衰老呀，飲咖啡減少氣喘呀，甚至食煙都可以紓緩壓力，呢啲就最啱聽。

唔怪之得成日有人話消委會不務正業，點解唔做一個詳盡嘅調查，睇吓口靚模有冇裝假狗，欺騙麻甩消費者買寫真；同埋日日聽到有個九流推銷員嗌「起錨」，聽得多會唔會命都短幾年呢？你話唔係更有迫切性咩？

Blog:http://sunsiupak.blogspot.com

阿豪觀點:睇波吔零食小心啲

消委會調查發現，有九成脆片零食含高脂肪其中一款所含反式脂肪更較成人每日建議攝取量多出達六倍，產品聲稱「不含反式脂肪」或「低鹽」，脂肪及鈉含量一樣超標！所謂「脆片」零食，即係卜卜脆嗰啲零食，好似話係蝦片呀、薯片呀諸如此類。嘩，呢排大家一路睇波一路吔零食，真係要小心啲咯……

其實呢啲都係「阿媽係女人」嘅顯淺道理啫，但唔食薯片唔隊啤，睇波食咩好呢？如果打邊爐咪一樣冇益，咁唔通走去沖碗麥皮，一路食一路睇波咩？

所以呢，豪伯對呢啲調查，一向都抱放棄態度。況且，我仲有一絲希望，就係以往只係有人做過調查，話零食冇益，打邊爐高脂高卡路里更加係人都知，但係似乎冇人研究過，兩樣一齊進行會有咩影響喎……話唔定，會「負負得正」都未定呢？

Blog:http://lukchiho.blogspot.com

網友觀點

飯　　民：今屆好多人都係揸住碗飯睇波，脆片零食吔少好多。

薯片大王：消委會又唔早講，已買定晒喇！冇得退貨唔知點算好！

小　　賓：食埋咁多唔健康嘅零食，世界盃未完已經食病咗！

波　　仔：睇波唔食卜卜脆零食冇問題吖，剝花生一樣得啫。