「玩具大王」旭日國際主席蔡志明一家人都鍾意食甜品，幾個月前，蔡志明斥資三百萬元喺自家物業九龍城廣場開咗間甜品舖「甜之迷」，仲交畀兒子加讚（Carson）同囡囡加怡（Crystal）打理，蔡家人人都有自己情迷嘅一款甜品，Carson仲按自己口味自創榴槤炸兩添！
Carson話，爸爸一星期至少嚟食一次，必食嘅係榴槤腸粉，所謂腸粉其實係用海藻同埋蒟蒻做成嘅低卡路里外皮，入邊加埋鮮忌廉同香味獨特嘅榴槤，食落清新好味。Carson自製嘅榴槤炸兩就係用同樣嘅腸粉皮，入邊包住炸過嘅榴槤，伴碟就有心形朱古力同埋士多啤梨，啖啖滋味無窮。
今年二十四歲嘅Carson平時畀人感覺唔多講嘢，其實佢做旭日執行董事之後學識好多嘢，都幫爸爸分擔唔少重任。佢講起工作好起勁，同平日好似判若兩人咁，難怪爸爸早前話會送架靚車畀佢，獎勵佢將九龍城廣場嘅人流推高兩倍以上，原來係無功不受祿。