本文重點
有「眾人媽打」之稱嘅前民政事務局常秘李麗娟退休後幾乎全職做善事，喺內地同本港嘅慈善界都好活躍，今個月底，媽打迎來六十一歲生日，佢將會搞個盛大生日會，不過，地點係上海，當日會有七百個青年出席。媽打為咗呢個盛事，近排要四出撲直版人民幣銀紙嚟封利是。其實，佢搵熨斗燙平佢就得喇，使乜左撲右撲呢？
上海搞生日會遊世博
媽打前日現身沙田馬場，講起三十號嘅生日就興奮。佢話，今年嘅生日會會喺上海搞，事關佢將以「龍傳基金」名義，夥拍青年團體遊上海睇世博，二十九號出發，同行有五百位香港青年。老友話借出地方畀媽打喺上海搞生日會，到時會請埋五百位青年、一百位上海義工及一百位上海小朋友齊唱生日歌。
咁多青年人陪佢過生日，媽打梗係識做，打算自掏腰包大派利是，仲想用新嘅直版人民幣嚟封添，近日佢就四出搜羅，撲咗四間大銀行先至搵齊。