近排「起錨」、「拋錨」聲四起，海洋公園尋日有個活動，主席盛智文都玩埋一份，呼籲遊客支持時，忽然振臂大叫「Act Now！」呢句口號就係政改嘅英文口號，中文口號即係「起錨」，唔知扮嘢文係撐政府，定係借用呢句口號嚟撐海洋公園呢？
話說扮嘢文尋日出席海洋公園中華鱘館開幕禮後，帶記者遊覽呢個新景點，睇到條條國寶中華鱘喺淡水游得咁舒服，就醒起要呼籲公眾保護水資源，佢話希望旅客參觀完中華鱘館後得到啟發，坐言起行，講到呢度最鬼馬嘅佢就舉手大叫「Act Now！」點知幫佢翻譯嘅前唱片騎師李麗蕊只係將Act Now譯做「迅速行動」。
扮嘢文聽到呢句翻譯後，明顯唔多滿意，即刻嗌多兩次，仲示意李小姐要譯得準確啲，李麗蕊最後都知道佢嘅意思，惟有講「好，我哋起錨去下一站！」扮嘢文先至收貨。