政改方案喺二十三日表決，廣東社團總會卻定於本月二十二日訪京，咁敏感嘅日子難免惹來好多揣測。據悉，總會早喺舊年五月換屆之後，就開始向北京「敲門」拜訪，但係一直未等到檔期呢個日子，約一個月前忽然收到通知，至於有冇其他安排，或者京官趁機向港人放話？真係冇人知。
上月初，中央同特區政府拍板六月二十三日表決政改，以避過「七一」遊行效應，理論上「6．23」前夕，北京會金睛火眼
住香港政改形勢，千揀萬揀揀正喺呢個時候接待訪京團，如果純屬一般社團活動，咁就真係有啲反高潮囉。
廣東社團總會有理無理，以最高規格籌備呢次訪京團，由主席、身兼全國政協委員嘅王國強帶隊，人數超過一百人，當中不乏重量級人物，好似中聯辦主任彭清華以首席名譽顧問身份隨團，名譽團長有一班全國政協常委陳永棋、郭炳湘同戴德豐咁。