政府問責團隊大搞「起錨騷」，仲連行政會議成員都落埋水，日前我哋喺中環撞到富貴黨前主席田北俊，佢話呢輪都幾忙，冇時間睇世盃，但時事就點忙都要留意，好似啱啱過咗嘅星期日睇亞視英文台節目《Newsline》，主持人問有份幫政府拍政改電視宣傳短片嘅行政會議成員夏佳理，點解政府唔搵行會召集人梁振英（CY），反而搵咗佢出鏡？田少驚嘆話：呢條問題真係問得好！
田少日前喺和記大廈樓下出現，講到行會成員都嗌起錨時，田少大惑不解，佢話三位行會成員夏佳理、胡紅玉同梁智鴻幫政府拍政改宣傳片，論資排輩，無理由少咗召集人CY嗰份㗎？到底係CY唔肯「落船」幫手起錨定有其他原因？
CY之前喺最低工資同貧富懸殊呢類敏感問題，成日搶閘發表意見，點解今次「政改起錨」騷，政府船隊幾乎總動員，獨缺CY？可惜夏佳理當日冇正面回答問題，只笑笑口叫主持人問番CY喎。