煲呔曾尋晚嘅表現真係幾失禮，一方面係佢嘅辯才唔夠水平，更重要嘅係政府機器失禮人，特首辦班人事前準備咗啲乜？點解煲呔曾一個似樣嘅攻擊都冇呢？

煲呔團隊出晒醜

呢場辯論一開始就冇預溫和泛民主派，好似當人哋冇到咁，結果畀人鬧大細超，溫和民主派講起辯論都以牙還牙，普選聯一個核心人物分析時更加睇通世情話，政改方案公布之後，香港反對派提出嘅意見同立場大都超出特區政府話得事嘅範圍，呢場波注定香港政府冇話事權。

既然港府高官冇權力、又冇牙力，煲呔曾帶領問責團隊落區搞起錨騷，幾咁歇斯底里嗌「起錨」都冇用啦，同樣道理，煲呔曾搵余若薇公開一齊噴口水，都對方案獲得通過冇作用。不過，佢辭鋒一轉：「佢哋喺幕前活動，點都吸引咗香港社會嘅眼球，等啲大人可以靜雞雞傾吓偈。」佢仲用細路仔玩遊戲機就唔使阻住大人做正經事嚟形容件事，意思係曾、余醉心打機、吹水，大人咪可以靜心做嘢囉，呢個拆局有幾咁貼近現實？大家自己意會啦。

不過，曾余辯之後，煲呔曾自己獻晒醜，仲暴露咗政府團隊嘅論辯功力連一個小小嘅政黨都不如，煲呔曾同埋佢嘅下屬真係要墊高枕頭思過喇。