心水清嘅市民一定留意到，呢幾年水果愈來愈貴，以前十蚊買五個橙，家陣只買到兩三個，部分水果品種閒閒地貴成倍。喂，人工冇得加，水果貴幾成，點頂呀？

市民捱貴果，皆因政府太懶惰。講起嚟成匹布咁長，等太一叮長話短說解釋吓。嗱，以前香港欄商可以將唔同產地入口嘅水果放喺同一隻櫃，然後運去內地。但○五年中開始，內地為防止有毒有害產品入境，凡係進入中國國境包括港澳地區等中轉站水果，要以貨櫃運輸，先運返內地，然後再分發。水果入口實施「原箱原包裝和原植物檢疫證」政策，本港欄商即時被玩殘，好多水果要原封不動先運返內地再拆櫃提取，然後轉運本港。

轉轉折折，費時失事，生果容易腐爛，造成損失唔在講，加埋內地嘅增值稅、關稅同運費，皮費重咁多，水果點會唔起價，生意點會唔難做？新措施衝擊下，全港水果欄商由三百幾家跌到二百七十家；從業人員更由十萬減少到只得四萬；生意少咗一半，水果售價就貴咗三成，直頭係攞命。

叮！內地實施新措施，河水不犯井水。但香港欄商冇計，唔等於港府可以翹埋雙手坐以待斃。浸會大學當代中國研究所嘅專家研究過措施條文後發現，港府可以要求內地授權喺香港設立「水果物流特別處理區」，欄商可以喺處理區監察範圍內先行提取供港貨品，原來天無絕人之路。

話時話，內地新措施出台五年，本港水果批發生意係咁跌，政府幫業界做過乜？專家睇過條文發現有轉機，你班自認「精英」嘅高官點解烏吓烏吓睇唔到，一拖五年，坐失良機？

講真，官員一向懶得就懶，拖得就拖，如果涉及內地政策，更加大條理由唔關自己事。嗱，內地舊年修訂《郵政法》，禁止外商包括港資公司投資經營國內信件速遞業務，令本港二百幾間中小型速遞公司嘅內地業務隨時執笠，受影響員工估計高達十一萬人。業界要求政府同內地傾，將呢部分業務納入CEPA範圍，但當局闊佬懶理，到依家都未有聲氣。

唉，官員做嘢唔用腦，眼大睇過龍，旨意佢哋幫港人解決問題，仲戇居過問和尚借梳。咪話太一叮唔提醒呀，專家已經出咗條好橋，點咗條好路畀你班官行，快啲諗計拆掂，保住香港水果轉口中心地位。唔係嘅話，全球最大水果交易平台，一定會變成世界第一嘅「食白果中心」。叮！