小白觀點:撐老友隨時被圍插

有位品學兼優嘅中學生喺facebook向女友落最後通牒，某日某時唔肯回心轉意嘅話就會「自動消失」，結果呢個死亡預告放咗幾日都冇人理，小朋友心灰意冷，生無可戀，喺梯間寫低咗「點解？」，準時喺時限後自尋短見。

睇得多青少年自殺新聞，本欄都好想問吓「點解」？冇錯，女朋友仔唔愛自己，老友死黨又全部唔知死晒去邊，真係幾難受嘅，但又難怪人哋當死亡預告冇到噃，依家小朋友遲到一粒鐘已經算係早到，放飛機電話都冇個亦一啲都唔出奇，好難相信今時今日，仲有個咁牙齒當金使、講得出做得到嘅細路喎又。

試試易地而處諗，當你上facebook見老友死意堅決成咁，又可以講啲乜呢？唔通好似社工團體咁講番一句「我點都撐你」咩，唔止吃力不討好，隨時畀人圍插，話你冷血到撐人去死添呀！

Blog:http://sunsiupak.blogspot.com

阿豪觀點:封大廈高位創就業

有位會考生喺facebook向女友箍煲，並且發出最後通牒，警告對方如果唔回心轉意嘅話，就會「自動消失」，結果有人仍然不以為意，最終真係搞出悲劇。

唉！今次已經係近排第N單年輕人輕生嘅事件喇，究竟我哋班後生仔出咗啲咩問題呢？如果話苦口婆心勸人凡事睇開啲，咁次次慘劇後都有社工出嚟講嘢㗎啦，照計應該天下太平噃……

豪伯思疑，特區政府與其成日吹噓不着邊際嘅「十大建設」，倒不如搞第十一大建設，就係封實晒全香港大廈嘅所有高位，就算阻唔到年輕人自殺，起碼都可以創造就業吖！

話時話，又話facebook可以拉近人與人之間關係嘅，點解仍然阻止唔到呢單慘劇㗎？究竟係依家嘅人際關係冷漠吖，定係佢哋理解能力低，以為「自動消失」只係「起錨」咁解呢？

Blog:http://lukchiho.blogspot.com

網友觀點

賓　　仔：學校應該搵老師同學生講吓失戀經驗，教佢哋點樣去面對失戀。

失戀專家：後生仔女要學吓分手技巧，處理唔好會生悲劇！

細路祥：喺facebook講嘢唔使負責，真假難分，誤以為係講笑咁就……

懦　　夫：咁同寫恐嚇信有咩分別，不過係公開之嘛。