真的假不了，假的真不了，但現實世界疑幻似真嘅情況真係多到不得了。政府狂谷政改起錨，有「疑似」公務員團體都湊熱鬧。一個消防人員經常瀏覽嘅非官方討論區就有人留言，話有一個「香港XX職工總會」最近向會員發電郵，叫人起錨，十六號參加支持政制向前走嘅維園活動。
電郵內容好簡單，就係「誠邀各位會員參加：支持政制向前走 大家相會6．19」，之後附註日期、時間同地點，仲補咗句「起錨！」。究竟「香港XX職工總會」嘅XX係乜？記者雖然唔係法證專家，但係蛛絲馬迹都識搵，既然消息喺消防員非官方討論區發放，就向消防人員嘅工會埋手，但睇嚟睇去，以「香港消防處職工總會」同「香港XX職工總會」最近似。
但香港消防處職工總會主席趙善聰斷然話：「冇！」，仲話：「我哋工會最近好忙，仲得閒搞其他嘢？」並聲言紀律部隊政治中立，同呢個XX職工總會冇關，冇向任何人發出呼籲人起錨嘅電郵。不過世事如棋，有知情人士話，聽講有總會嘅理事確實收到一個類似嘅起錨電郵，今次真係離奇過鬼古，睇嚟愈近政改投票，類似嘅鬼古陸續有嚟！