宣傳政改方案嘅起錨行動劣評如潮，外界仲寸煲呔曾落區嗌口號、講幾句嘢都要睇貓紙，認真失禮死人，又質疑佢講嘅嘢係咪發自真心。
呢排建制派花樣百出咁撐政改方案，而工聯會副會長陳婉嫻尋日出席長者活動時亦首次公開撐政改，仲話歡迎煲呔曾落區宣傳。嫻姐話落區混亂係正常兼冇辦法，深信高官落多幾次區就唔會再混亂。
嫻姐撐政改呢番話，同場嘅社民連立法會議員「長毛」梁國雄點會聽得入耳吖，佢寸寸貢咁話：「我真係好羨慕嫻姐唔使用貓紙都可以撐政改，若果說話發自真心，又點使用貓紙呢？」嗱！長毛擺明係隔山打牛，借嫻姐嚟寸煲呔曾戲假情又假啫！
