煲呔曾兩公婆尋日由上晝十一點至下晝一點，去過中環鴨巴甸街、灣仔太原街同筲箕灣東大街派傳單，但政府新聞處下晝五點至發放影片，瞞天過海六粒鐘。

商販嫌誠意麻麻

其中一段係商販李先生（圖）緊緊捉住煲呔曾隻手，問起錨幾時至有終點，到煲呔曾轉身離開，李先生仲大嗌：「我都會做好呢份工！」唔知係咪想寸煲呔曾冇做好佢份工呢？事後，李先生同記者形容煲呔曾好熱情，捉住佢隻手成三分鐘，但講到誠意，李先生話：「差唔多，都係標準答案。」咁精警嘅評語，可惜新聞處嘅製作片段欠奉，唔係就更有真實感嘞。

同日，煲呔曾又喺facebook起錨群組撰文，話尋日朝早落咗幾場大驟雨，但諗起方案表決在即，都係決定冒雨落區，又話近日已開始籌備新一份施政報告，將會積極回應市民關注嘅民生議題。唔通明知政改勢遭否決，想用民生議題轉移孭鑊壓力？

特首辦主任譚志源事後交代，今次挑選嘅三個基層地區都係煲呔曾童年時住過嘅地方，事前冇通知傳媒，係希望能低調探訪舊街坊喎！係想低調抑或唔想畀人踩場呀？