煲呔曾嘅「真兄弟」、財爺鬍鬚曾，尋日喺個人網誌度主動提及喺呢個禮拜四進行嘅「曾余」辯論，但佢不斷長他人志氣，話余若薇一向喺法庭裏面雄辯滔滔，辯才毋庸置疑。咁講，擺明係睇衰「大佬」煲呔曾辯才渣，肯定講唔贏對手啦！

轉頭佢又不忘為大佬補底，話煲呔曾近期專心處理歐洲債務危機同本地政務，所以難以專心準備辯論咁話喎。嘩！佢竟然畀埋藉口大佬，即係幫佢鋪定下台階啫！跟住佢仲將啲要求不斷降低，話呢場辯論唔需要理邊個贏、邊個輸，只要煲呔曾係向市民解釋政改方案嘅理據就達標嘞！

自揭以前唔知民間疾苦

鬍鬚曾喺網誌度既想幫大佬護航，但又睇衰大佬未打先輸，兼鋪埋紅地氈畀大佬落台，但佢就愈講愈亂，搞到自己好似搭完個台又踢大佬落台咁，究竟佢想幫大佬抑或想害大佬先？真係唔寫好過寫。鬍鬚曾最後仲加句：「Donald，加油，為民主、為香港起錨。」認真骨痹！

呢篇網誌仲有樣嘢睇到人眼都凸埋。鬍鬚曾話喺起錨活動嘅「洗禮」之後，政府同立法會議員都會明白到「直接面對民意」嘅重要，唔會將黨派利益凌駕公眾利益之上。

鬍鬚曾一心想寸啲政黨有私心，但同時亦自摑。煲呔曾唔止一次話問責團隊要落區，直接聽取民意，所以鬍鬚曾早就應該明白乜嘢叫做放低身段、聆聽民意，佢依家講出咁嘅說話，即係話成個問責團隊以前高高在上、唔知民間疾苦啦！一篇網誌就露晒底，反映「孖曾」同其他問責團隊成員根本就係講一套、做一套。