兩年前，灣仔發生塌招牌殺人事件，一名四十七歲清潔女工晨早上班經過一間泰國餐館門外時，頭頂一幅重約二百磅的巨型木製招牌，疑因日久失修加上連日天雨以致木質霉爛，突然塌下，清潔女工被砸個正着，頭部被壓在招牌下重傷倒地。多名途人合力將招牌托起，惟女事主當時已全無氣息，送院後證實不治。
類似悲劇，上周五幾乎重演。油麻地一個近二百磅重、廢置達六年的燈箱招牌，支架嚴重銹蝕，突然解體塌下，一名廿一歲少女被擊中，復遭壓住雙腳受傷，途人合力抬起膠板救出該名少女。此類僭建廢置招牌，一些舊區如油尖旺的橫街小巷最常見，颱風季節在半空條條Fing，非常牙煙！若從高處墜下，路過途人唔死都一身潺，說它們是「都市炸彈」，一點也不過分！危險招牌無人理，港府明顯監管不力。
雨季即將來臨，七、八月更是颱風季節，港府應該投放更多資源去清拆廢置招牌、去疏通渠道，咪成日掛住趕絕街邊小販、沒收民主女神像！多點做實事，為民生出多分力好過喇！
生活在香港，真係危機四伏。行行吓街，分分鐘有老鼠追住你咬，早前不是有女遊客在中環鬧市被十吋長老鼠咬傷嗎？此外，逛街隨時有鏹水彈從高處擲下，你避得一時，亦未必避得過迷幻的士或貨Van！總之，你將自己變成鐵甲威龍，或者有一線生機！當然，如果你要呼吸新鮮空氣，又係冇好結果，連圖書館自修室的空氣都惡劣如毒氣，香港人何處覓淨土？