《太陽報》創刊十一年，不斷求新求變，讀者人數年年上升，最新讀者人數係近一百三十萬，穩佔全港銷售報章第三位。為咗答謝讀者多年捧場，《太陽報》決定強勢出擊，「衝破黎明，再起革命」，不惜打破本港暢銷報章千篇一律搶早出版嘅格局，犧牲早紙時間延遲出版，務求為讀者提供全方位、最及時嘅新聞資訊增值服務。

新聞價值在於「新」，目前本港暢銷報章出版時間差唔多，基本上係報道前一日發生嘅事。本報一向以讀者為本，呢次除咗版面設計力求創新，夠快夠準，與眾不同之外，亦會投入大量人力物力，為讀者報道本地同全球最新最詳盡嘅新聞，囊括國際金融財經、名人娛樂同體育資訊等等，總之包羅萬有，無一漏網，絕對超值。

有幾超值？等太一叮話你知。先唔講其他，南非世界盃決賽周再過幾日就開鑼，球迷最關心係自己鍾意嗰隊波戰績如何。但南非同香港有六個鐘時差，等得嗰邊有賽果出，呢度其他報紙已經出晒街。家陣香港球迷有福嘞，瞓醒覺他他條條打開份《太陽報》，各場賽事戰況戰果詳細奉上，一覽無遺，係咪好過癮呢？

炒金炒股炒外匯，投資者睇《太陽報》更加有着數。當香港夜深人靜嘅時候，歐美市場正如火如荼，延遲出版時間嘅《太陽報》唔淨止可以睇到華爾街開市行情，連中午收市行情亦全部睇晒。掌握金融市場最新行情，投資梗係更加得心應手，勝券在握啦。一句講晒，睇《太陽報》，心中有數，投資快人一步，想唔發都難咯。

就算唔睇波、唔炒股，《太陽報》一樣有好嘢益大家。娛樂新聞老少咸宜，名人趣聞逸事個個都有興趣知，圈中哥仔姐仔最鍾意蒲通宵，佢哋三更半夜經常有出人意表嘅搞作，喺《太陽報》娛樂版一定見得到，各位又點可以錯過呢？

《太陽報》版面年輕化，充滿時代感，咁多年來贏盡口碑，銷路節節上升。為咗答謝讀者支持，本報不斷求變，不斷進步，唔係太一叮賣花讚花香，讀者睇過改革後嘅《太陽報》，一定覺得物超所值。

其實，如果讀者想早啲睇到報紙嘅，唔使失望，太一叮亦有好介紹，呢，《東方日報》會早兩個鐘出紙，一樣咁精彩，讀者可以先睹為快。兩報加埋，讀者超過四百萬，雙劍合璧，天下無敵，贏足競爭對手九條街！

太陽當空照，人人齊歡笑。《太陽報》呢次強勢出擊，衝破黎明，全靠讀者支持，多謝晒！