該會會長何栢良醫生喺呢個月尾落莊前，再次鞭策醫管局，上禮拜向局方高層發咗兩封信，其中一封畀醫管局行政總裁蘇利民，提醒佢舊年曾承諾成立常設委員會，定期檢討員工嘅薪酬調整，另一樣係將醫管局員工嘅醫療福利，同公務員睇齊，即係攞藥唔使錢，唔好再發生早前有患癌醫生因為冇錢醫病而死亡嘅悲劇。

何醫生批評局方講咗唔算數，對員工嘅承諾既冇時間表，又唔肯落實，好似採取拖字訣咁，等佢落咗莊就當冇事發生。佢仲好有創意咁將港府標語嘅「2012政制改革起錨」，改為「醫管局總部『行政失效』起錨」，促請當局速速兌現承諾。