忘我叫口號搶鏡

今次場騷，事前並冇講過會有議員或者政黨落場幫拖，點知當財爺鬍鬚曾同財經事務及庫務局副局長梁鳳儀落到坑口站，居然會有人比佢哋更早到場起錨，呢個咁好中氣嘅人就係富貴黨西貢區議員「哪吒」方國珊。佔盡地利嘅哪吒揸住支無線咪進入忘我狀態咁叫口號，搞到企喺佢後面嘅梁鳳儀勁無奈，至於上次喺首部曲畀人質到口啞啞嘅鬍鬚曾就更加無奈。

不過，原來富貴黨前主席田北俊完全唔知愛徒今次嘅出位行徑，田少拿拿臨打畀現任主席劉健儀（Miriam）問佢到底係賣緊乜嘢藥，Miriam就話個黨冇傾過要落區撐政改，哪吒咁落力，實在有啲鹵莽，黨高層似乎唔係咁欣賞。

同喺將軍澳區，保安局局長李少光去到東港城宣傳時，遇正「法國小施丹」馬丹出席商場搞嘅三人足球賽，雖然李少光冇得交換球衣，但派政改襟章一樣受歡迎，仲有得同班小球員合照添！