煲呔曾自把自為單挑公文袋黨魁余若薇喺嚟緊嘅十七號喺電視辯論政改，而喺過去一連兩個周末，佢更自導自演，擔綱上演政改起錨爛騷，練到面皮成尺厚，一副嗌交戰鬥格，變相為辯論大戰偷步熱身。對手余若薇尋日亦唔執輸，急急落區推銷自己，同煲呔曾一樣咁有騷味。
平日一身名牌衣飾嘅余大狀透過社區組織協會安排，紆尊降貴跑去深水埗嘅悶熱陰暗籠屋板間房，話要親身感受低下階層嘅生活情況。佢同在職貧窮人士、兒童、新移民、精神病康復者同露宿者等開會，聽吓大家講講公屋上樓慢、護老院輪候時間太長同託兒服務不足咁，開宗明義話要收集民意，帶入政改辯論之中。呢次拋頭露面可謂一雞兩味，佢彈完煲呔曾推銷政改冇方向、冇目標，又彈佢落區連市民簡單嘅當面對質都答唔到，起錨騷簡直當市民傻嘅咁話。
煲呔曾尋日場起錨騷第二波喺超嘈嘅抗議聲中上演，亦因為傳媒傾全力追訪，令余大狀落區變得好靜局，冇乜聲勢，呢個結局，對佢哋兩個嚟講唔知算唔算兩敗俱傷呢？