呢排煲呔曾好搞唔搞，突然伸個頭出嚟話要搞「三司十二局仝落區」爛騷，早前喺第一波宣傳嘅時候，煲呔曾企喺前面聲嘶力竭咁大嗌「起錨」，但企喺佢後面嗰班問責團隊就一盤散沙。

第一波爛騷過後，市民鬧爆擾民同洗腦，但係煲呔曾尋日竟然唔理民情，又帶隊落區做爛騷，而第二波嘅宣傳又係得個亂字，但唯一可以睇到嘅就係佢哋開始有啲隊形。

話說煲呔曾尋日落東區做騷，最令人眼前一亮嘅唔係佢嗌得幾大聲，而係佢頭上嘅髮絲，唔知佢係特登扮親民抑或扮匆忙，所以冇好似平時咁蠟起啲頭髮，一副頭髮亂了咁款，仲發現佢豈止髮線向上，由前額到頭頂嘅頭髮仲極之稀薄，兼且開始拉髮補位，睇嚟佢冇幾耐可能要好似立法會金融服務界議員金勞詹咁「搭橋」。

抓爆頭都救唔到民望

無獨有偶，陪喺佢側邊嘅心戰室成員都有類似嘅情況，例如新聞統籌專員何安達頭頂髮絲都愈嚟愈少，特首辦主任譚志源算係有自知自明，早就索性剷咗個光頭，而新入特首辦做特別助理嘅陳岳鵬頭髮都好少。

老實講，煲呔曾呢幾年倒行逆施，做嗰樣錯嗰樣，早前有民調顯示佢嘅民望跌到肥佬，咁就知佢同班心戰室成員抓爆頭都諗唔到方法解決，所以先搞到咁。咁都未知衰，依家佢仲帶隊落區周圍點火，搞到社會分化、市民連場互罵，社會咁唔和諧都唔知點收科。

再係咁落去，睇怕遲啲佢哋實抓到變晒光頭，咁咪變咗「光頭團隊」治港囉，而光頭都算係有啲隊形嘅，但咁嘅隊形睇見都覺得可悲。