小白觀點：滴水不滲裝黑錢一流

內地有人周圍收購日本名牌奶粉罐，用嚟做乜？睇嚟都唔慌係好嘢啦，有人擔心極有可能係奸商收咗啲真罐，再裝啲不明來歷嘅奶粉入去，以假當真，到時又唔知會有幾多BB中招。

小白老弟覺得大家又唔使咁反應過敏嘅，收買佬收罐唔一定係作奸犯科之用，你知啦，日本製品一向都係信心保證，連個罐都可以做到滴水不滲，零舍密實過人，轉手賣畀啲內地巨貪，用嚟裝幾億放落河底，相信有大把市場；又或者有愛國人士，不滿日本人氣組合SMAP取消喺世博開演唱會，為報國仇家恨，入啲假奶粉賣番去日本，荼毒啲㗎仔BB亦唔奇喎。

不過，只係為咗區區嗰二十蚊，而放個罐畀收買佬，未免食之無味棄之可惜，如果等錢使嘅話，仲有大把搵錢途徑，我建議大家，不如動員一家大細，位位收二百蚊去撐政改好過啦。

Email：sunsiupak@gmail.com

Blog：http://sunsiupak.blogspot.com

阿豪觀點：火星文標籤一樣受落

啲無良商人愈嚟愈叻，搞到為人父母嘅買奶粉，都要打醒十二分精神。內地有奸商收購啲日本名牌奶粉罐返嚟，再裝入不明來歷嘅奶粉，啲人見到日文標籤，仲唔仆到去買咩！

唔好怪豪伯刻薄，其實同胞們都要檢討吓自己，係咪有啲崇洋媚外呢？大家唔好唔記得喎，近日受到日本宮崎縣爆發口蹄疫情影響，內地當局宣布暫時禁止日本奶粉進口，既然係咁，即係話食用時有一定風險啦，咁點解仲要一窩蜂咁搶住要買呢？

唉，怪就怪內地奶粉嘅紀錄實在太衰喇，一陣又大頭嬰兒，一陣又結石娃娃，點知下次又搞邊科㗎？記得三聚氰胺奶粉肆虐嗰排，好似話連非洲國都拒絕入口中國奶製品。所以話呢，莫講話見到日文標籤吖，同胞們見到完全唔識嘅火星文，都一樣受落呀！

Email：lukchiho75@hotmail.com

Blog：http://lukchiho.blogspot.com

網友觀點……

奶粉仔：呢班可能係愛國商人，為雪國恥就去惡搞日本貨。

小新：嗰啲冒牌加工奶粉，毒性隨時勁過口蹄症！

秦先生：使乜煩吖！用母乳餵哺就唔怕造假囉！

窮爸爸：依家啲娃娃唔想食壞就要被迫捱貴奶粉！