之但係，近排間廟閂晒大門，門上仲貼咗一張警告啟事，話廟內嘅木樑被白蟻蛀蝕得好犀利，要安排維修，忠告入廟人士考慮自身安全咁話。即係點呀？咪就係叫各位善信遊客自求多福囉，有乜嘢冬瓜豆腐，洪聖爺都保你唔到。

入洪聖宮睇吓，真係會驚到震。裏面好多條樑同柱都畀白蟻蛀過，有啲橫樑已經彎晒，全靠用鐵架或者木柱頂住，唔係分分鐘會折斷，條樑一斷，間廟就會冧。咁就大鑊咯，到時所有珍貴文物，包括古色古香嘅木匾同銅響板都會受影響。

大家一定會問，呢間咁出名嘅歷史建築物畀白蟻蛀成咁，政府知唔知呀？班高官近排成日吹水，話要保育歷史古蹟，仲推出一個歷史建築維修資助計劃，家陣洪聖宮危危乎，政府點可以翹埋雙手呀？

叮佢個鎯鎯，唔提政府仲冇咁嬲，一提就把幾火。實際上，洪聖宮舊年年初發現白蟻蹤迹後，就立即向發展局申請維修資助，但係拖咗成年，最近先至批落嚟，而且只得一百萬元咁大把，顧問評估，只夠維修間廟嘅第二進。但係第一進一樣畀白蟻蛀過，可唔可以撥多啲錢呀？對唔住，歷史建築維修資助計劃有規定，資助上限一百萬。如果想維修第一進，就等工程完工之後再申請啦。

話時話，政府實在太死板，每個申請資助項目，無論大細、無論問題幾嚴重，撥款都一律唔可以超過一百萬元。發展局官員話喎，咁樣做，就可以用有限嘅資源令更多歷史建築受惠。其實係搞到樣樣都唔湯唔水至真。例如洪聖宮，只維修第二進，仲話完工後就要對公眾開放，如果善男信女行入第一進進香，出咗事邊個負責呀？政府咁縮骨，村民惟有發動集資自行維修。

一句講晒，政府口口聲聲保護古蹟，其實都係大隻講。睇吓近年嘅保育項目，有邊個唔畀人炳到七彩？有七十幾年歷史嘅景賢里拆到甩皮甩骨，永利街一時話拆，一時又話唔拆，搞到七國咁亂。家陣又眼白白睇住洪聖宮變咗白蟻竇，唔怪得之人人都話，政府靠得住，豬乸會上樹嘞。叮！