復活節連清明節假期長達五日，中港直通巴士站都擠得水洩不通。上周五首日長假期早上七點幾鐘，竟然喺太子維景酒店門外遇到港區全國人大代表盧瑞安，酒店鄰近係中港直通巴士站頭，莫非佢又係搭直通巴士到內地玩？但見佢着住西裝咁斯文又唔多似去玩喎。原來身為中旅社董事長嘅佢，係到太子分社巡視業務，睇吓長假期嘅運作順唔順暢。
盧瑞安話做董事長點都唔可以假手於人，要親身巡視吓直通巴士嘅賣票情況，為假期開工嘅同事打氣。佢喺七十年代加入中旅社至今，凡事親力親為，成日到內地踩線籌組旅行團，好似兩年前青藏鐵路通車後，佢先後兩次去西藏踩線，所以晨早到站頭巡視，碎料嚟啫！
