曾喺世界數學賽奪獎嘅神童猷君，深得賭王寵愛，點名讚佢係「好算盤」，猷君同馬圈甚有緣，十三歲就代老竇入馬場拉頭馬兼捧盃，開創馬會先河。

日前「爆冷」再度出戰，猷君「奉召」入場到實。穿上筆挺西裝嘅佢雖然只得十五歲，但表現淡定，全程同世叔伯有講有笑。開跑一刻，佢好肉緊咁為「爆冷」做啦啦隊。可惜「爆冷」只係跑第三，猷君睇落有啲失望，但講起老竇近況，佢又精靈起嚟，話老竇健康唔錯，好快入得馬場觀戰都未定。