呢排Eason陳奕迅開騷，粉絲逼爆紅館。據聞，部分靚飛更炒高至千九蚊一張，富貴黨西貢區議員「哪吒」方國珊都加入撲飛一族，佢個幾月前已四出撲飛，結果買到四張，前晚就請咗黨主席Miriam劉健儀、契爺胡楓同胡楓孫仔，齊齊坐VIP位睇騷。
哪吒迷上Eason多年，買齊對方唱碟不在話下，每次Eason開演唱會必定飛身捧場，可以話係忠實粉絲。哪吒對偶像金曲琅琅上口，最鍾意係嗰首《明年今日》。
而喺開騷前，哪吒約埋契爺同Miriam喺門口集合，為免泊車搵位難，Miriam改搭火車，可惜因為唔熟紅館地形，集合時間到仍未見佢出現。哪吒急如熱鍋上螞蟻，拿拿臨派助手去紅磡火車站接Miriam，好彩最後趕及切入場睇演唱會啫！